По огромниот егзодус изминативе две години, во таборот на „црвено-црните“ од шампионската генерација останаа само Дибиров, Кристијан Дисингер, Иван Чупиќ, Стојанче Стоилов и Хлеб Калараш.
Сега Вардар не е фаворит како во минатото кога се појавуваше на завршните турнир во СЕХА-лигата, па затоа и руското крило очекува да е потешко.
„Како размислувам за овој Ф4 во споредба на претходните? Уште кога прв пат играв во 2014 година на првиот фајнл-фор и тогаш не мислев дека сме фаворити или аутсајдери. Секој турнир за нас е многу поразличен од регуларен дел. Веројатно тоа е разликата што оваа екипа го знае тоа, знае кога треба да даде 100 отсто и кога 120 отсто од себе. Сега ситуацијата е многу поразлична“, вели Дибиров.
Воиграноста секако е проблем, бидејќи системот на игра е нов, а нови се речиси сите играчи. Потребно ќе биде подолго време за тимот да почне да функционира, а Дибиров смета дека тоа ќе биде по завршувањето на првата полусезона.
„Јавноста и сите очекуваат повеќе од она што го покажавме на терен. Не сакам да го правадам нашиот тим, но кога 10 играчи се вклопуваат е тешко. Тоа не функционира како што треба. Потребно е време, така беше и со Раул Гоназалес, кога му требаа четири години, не месец или два, а потоа со Роберто Парондо имавме поставен систем. Полесно е да се менува системот кога имате нов играч, но ние сега почнуваме од нула. Цел тим го променивме и знаевме дека со тој притисок дека треба да се носиме. Очекувам добри настапи од себе и екипата, кога ќе помине полусезоната. Знаеме зошто сме тука и знаеме кои се задачите од клубот. Ние сакаме да ги реализираме. Не можеме да ги постигнеме во септември или октомври, но со мали чекори сакаме да одиме напред. Сега играме полуфинале со Загреб во СЕХА на секој натпревар мораме да покажуваме подобро од претходниот натпревари и така да се движиме. Не треба да летаме во облаци. Имаме голема подршка меѓу нас играчите и тренерот. Ова е тежок период, но мораме да го минеме“.
Противникот на Вардар во полуфиналето Загреб е во слична ситуација. Игор Вори дојде на клупата, а многу играчи си заминаа. Дибиров смета дека ова ќе биде дуел на две екипи кои ќе го бараат своето вистинско лице.
„Загреб е во слична ситуација како нас, променија тренер имаат нови играчи, го сменија малку и костурот на тимот. И тие треба да бараат игра, како и нас. Кога имаш квалитетни играчи може на еден натпревар може да се случи се. Помеѓу себе ќе играат две екипи кои што го бараат своето ново лице. Ќе видиме кој побрзо успеал да стигне до тоа“, заклучи Дибиров.
