Столе Димитриевски без сомнеж е еден од најдобрите, ако не и најдобар поединец на Македонија по првите две кола на Европското првенство. Голманот на Рајо Ваљекано беше сигурен и одличен меѓу стативите во двата натпревари, па со своите интервенции во повеќе наврати ја спасуваше Македонија.
Сега, пред дуелот во Амстердам, Димитриевски најави дека селекцијата ќе се бори и сака да дојде до позитивен резултат.
„Задоволен сум од тоа како одигравме во првите два натпревари. Сепак, не делеа делови од секундата да извлечеме некој добар резултат. Сега сме во Амстердам и тука сме да победиме. Би сакале да ги израдуваме луѓето во Македонија со победа или барем позитивен резултат“, смета Димитриевски.
Иако загубија од Австрија и Украина, избраниците на Ангеловски имаа и светли моменти, а останува надеж дека Македонија може да направи подвиг и изненадување во Амстердам.
