Одржувањето на состанокот на иницијативата „Отворен Балкан“ во Белград не е доведено во прашање.
Најавената оставка на премиерот Зоран Заев сепак не го минираше одржувањето на иницијативата Отворен Балкан. Наместо Заев, утре во Белград до Вучиќ и Рама ќе застане вицепремиерот за европски прашања, Никола Димитров, потврдија од Владата за Канал 5. Веста ја потврди и домаќинот, српскиот претседател Вучиќ.
-Верувам дека ќе дојде г-нот Димитров и уште некој кој го заменува г-нот Заев во владата. Ќе имаме многу важни разговори и мислам дека сами можеме да ја менуваме нашата иднина многу подобро отколку да дозволиме некој друг да ја менува. , изјави Александар Вучиќ, претседател на Србија
Најавеното повлекување на Заев, втор ден се анализира и во регионот и во Србија, од каде повеќето проценки се дека без разлика на финалниот епилог, идејата Отворен Балкан ќе преживее и ќе продолжи да се развива.
-Оваа криза на власт во Македонија ја внесува земјата во едно ново транзициско време, кое мене многу ме потсетува на нешто што можевме да го видиме во Црна Гора и дека можеби по следните избори, за кои верувам дека ќе бидат вонредни, ќе дојде до формирање до една експертска влада, која ќе мора да води сметка за своето опкружување, но и за намерите на ЕУ да одржува еден вид надворешно политички статус кво на овие простори, вели за РТС, Владимир Тодиќ, историчар
Иницијатива, популарно наречена Мал Шенген се формираше пред две години, замислена како мост кон иднината на Западен Балкан и почеток на нова ера во регионалната соработка меѓу трите земји. На последната средба во Скопје во јули тројцата лидери ставија потпис на договори за слободен проток на стоки, укинување на работните дозволи и соработка за заштита од природни катастрофи. Главната цел е од 2023-та година практично да се укинат границите меѓу трите земји. На агендата утре и задутре, освен панел дискусија, предвидени се лидерски средби и средби со претставници на компании од Македонија, Албанија и Србија на кои што ќе биде разговарано за олеснување на трговијата.
