Модната индустрија е еден динамичен свет во кој се’ се мери преку идеи. За жал, во последно време се’ поголем акцент се става на квантитет и профит наместо на оригиналност, а поради недостаток на инспирација, многу модни куќи и дизајнери копираат туѓи дела.
Токму таков случај е и скандалот со Диор кој неодамна креирал колекција на волнени наметки и капути кои се речиси идентични со романската народна носија.
Поради својот впечатлив изглед, силните бои и атрактивните шари, веднаш било јасно дека ваквите парчиња се веќе видени во многу слична варијанта. Набрзо се покажало дека станува збор за традиционална романска носија која потекнува од регионот Бихор.
Дизајнерите на Диор речиси во целост ги прекопирале шарите и дизајнот на споменатите парчиња и ги сместиле во својата колекција за есен/зима 2018 година. Ваквите модни парчиња се продаваат по цена од неверојатни 30 илјади долари, при што жителите на Бихор не добиле никаков паричен или било каков надомест за кражба на авторски права бидејќи модната куќа не признава дека сторила вакво дело.
Сепак, изреволтирани од ваквиот чин, уредниците на романското модно списание “Beau Monde” одлучиле да застанат на патот на ваквото бесрамно однесување така што покренале кампања за заштита на културното наследство. Со помош на локалните занаетчии и дизајнери, тие покренале своја модна линија која има за цел да ги заштити традиционалните носии и националниот идентитет.
Проектот наречен “Bihor Couture” им овозможува на љубителите на модата да си приуштат автентични парчиња со врвна изработка по далеку пониска цена, а од друга страна, заработените пари ќе се пренасочат за финансирање на локалните дизајнери кои се задолжени за изработка на парчињата облека.
