Нов Зеланд на почеток на месец декември ќе го заврши тримесечниот карантин во најголемиот град во земјата Окленд и ќе воведе нова стратегија во борбата против Ковид-19, изјави премиерката на државата Џасинда Ардерн.
Премиерката изјавила дека од 23:59 часот на 2 декември во Нов Зеланд ќе почне да се применува нова метода во борбата против Ковид-19 и ќе се настојува да се сузбие делта сојот на коронавирусот.
„Тешка вистина е дека делта сојот е тука и дека не е подготвен да исчезне. Иако ниту една земја не успеа да го елиминира делта сојот во целост, Нов Зеланд е во подобра положба од останатите земји да се избори со него“, изјавила премиерката.
Досега нејзината влада настојувала целосно да го елиминира вирусот, подготвувајќи т.н. политика на нула ковид, со строги мерки на заклучување, ригорозни тестирања на контакти и строги контроли на границите.
Новиот систем кој не предвидува заклучување претставен е како систем „семафор“.
Зелено значи дека нема да има никакви контроли за вирусот, портокалово значи да се носат заштитни маски на некои места, а црвено им дозволува на продавниците да бидат отворени за вакцинирани клиенти со потребно почитување на физичката дистанца.
Инаку, како последица на коронавирусот во Нов Зеланд, кој има пет милиони жители, починале 40 лица, но притисокот се зголемил за да заврши карантинот воведен во Окленд кој бил воведен во месец август кога бил детектиран делта сојот.
Премиерката прво предвидела дека ќе примени таква политика кога стапката на вакцинација ќе достигне 90 отсто во земјата, но на крајот го поместила повторното отворање на градот со сегашната стапка на вакцинација од околу 83 отсто.
Премиерката изјавила дека Окленд прво ќе биде во црвена категорија, додавајќи дека властите уште класираат други зони.
