Привремената блокада на Суецкиот канал им овозможи на Русија и Кина подобро да ги промовираат своите трговски рути и да го доведат во прашање американскиот модел на глобализација, напишал францускиот новинар специјализиран на економски теми, Франсоа Ленглет, во коментар кој го објавил “Ле Фигаро”.
“Економските последици од инцидентот можеби се безначајни, но геополитички постојат. Веднаш по заглавувањето на бродот “Ever Given”, Русија предложи алтернативен пат меѓу истокот и Европа кој е 5.000 километри пократок од Суецкиот канал. Кина го направи истото со Поларниот пат на свилата”, вели Ленглет.
Кинезите и Русите ги предизвикуваат Американците
Се нагласува дека способноста за создавање на трговски патишта и надзорот над нив секогаш се сметало за обележје на моќ. Новинарот потсетува дека Суецкиот канал го изградиле Европејци, вклучувајќи и Французи. По Првата светска војна на неговата одбрана одговорна била Велика Британија.
“Набрзо го отстапува местото на новиот светски лидер, САД, кои ги контролирале трговските патишта во текот на 20-тиот век”, вели Ленглет.
“Денеска американската доминација ја предизвикуваат Кина и Русија, кои сакаат да понудат сопствен модел на глобализација со сопствени трговски рути”, заклучува тој.
Преку Суецкиот канал минува 12 проценти од светскиот товарен сообраќај, а воедно е една од најраздвижените пловни патишта за испорака на нафта во светот. Преку него минуваат осум проценти од бродовите кои пренесуваат гас. Преку каналот минуваат 19.000 бродови годишно или повеќе од 50 дневно.
