Со години наназад навивачите на Интер сонуваат за денот кога Жозе Мурињо ќе се врати на „Џузепе Меаца“, ќе заведе ред по речиси деценискиот хаос во кој се наоѓа клубот и ќе ги води „Нероазурите“ до нови успеси, а оваа желба наскоро изгледа би можела да им се исполни.
Во екот на трансфер сагата настаната поради неизвесноста околу трансферот на Марек Хамшик во кинески Далијан, новинарот на миланската телевизиска куќа „ТелеЛомбардија“ Давиде Русо ги алармираше сите фанови на Интер, но и цела Италија со следната информација: Жозе Мурињо пристигнува на ручек со генералниот директор Бепе Марота.
Според информациите, Мурињо во четврток ќе му биде гостин на Марота во еден реномиран ресторан, што укажува на тоа дека „Специјалниот“ е сериозна варијанта за жешката клупа на Интер! Лучијано Спалети во последните недели трпи огромен притисок поради лошите резултати во кои клубот се наоѓа, особено по поразот од давеникот Болоња на домашен терен. Поедини информации од Италија укажуваат дека СПалети би можел да биде отпуштен веќе во недела, односно веднаш по натпреварот со Парма, но никакви поцврсти тврдења немаше. Спалети имал разговори со Марота, но и тогаш беше потврдено дека актуелниот тренер не е условен дека мора да ја совлада Парма.
Не треба да се потсетува дека Антонио Конте беше виден како прв кандидат да го наследи Спалети на клупата на Интер, дури италијанскиот стручњак беше виден како се шета во близина на седиштето на Интер, а Марота веќе имаше некои прелиминарни разговори со поранешниот тренер на Челзи. Меѓутоа, сега е прашање дали Мурињо е меѓу главните кандидати, или клупската управа се одлучи да го почувствува пулсот на некогашниот стручњак.
Жозе Мурињо е архитект на најголемиот успех во историјата на Интер, со кого во сезоната 2009/10 ја освои популарната Триплета, односно Лигата на шампионите, Серија А и Купот на Италија, а дел од тимот беше и нашиот Горан Пандев. Откако Мурињо си замина тоа лето, Интер е во хаос. Променети се десет тренери за девет години, а се започна со Рафа Бенитез, кој набрзо беше сменет од Леонардо, а подоцна се редеа Гасперини, Раниери, Страмачони, Мацари, Манчини, Де Бур, Пиоли и од летото 2017. година Спалети, со тоа што Стефано Веки во два кратки наврати беше преодна варијанта.
