Комплексот ОЛ – Ингланд клаб на кој се одржува грен слем турнирот Вимблдон е како мал град кога се игра најпрестижниот тениски турнир секое лето. Важни „алки” во текот на двете недели додека трае турнирот се и собирачите на топки, кои напорно работат за да им бидат од помош на тенисерите.
Нивната работа не е ни малку лесна. Момчето кое со години ги собира топките на Вимблдон, а работи и на познатиот тениски комплекс во Лондон, откри како се однесуваат тенисерите во текот на одигрувањето на натпреварите.
-Роже Федерер е вистински џентлмен во се што работи, па и во односот кон собирачите на топчињата. И Новак е фин, исто како и Рафаел Надал. Шпанецот најчесто го бара пешкирот од сите останати. Понекогаш и по два пати во текот на еден гем, но тоа не е проблем. Проблем е неговото опсесивно нарушување. Тој сака точно се да подреди на свое место според одреден шаблон – опремата, шишето со вода, тргнува со посебен чекор… и малку е тешко да се навикнеме на тоа, истакна младиот Англичанец.
Исто така собирачот на топки ги прокоментира особините и на големата шампионка, Американката Серена Вилијамс.
-Серена е одлична, но момците и девојките кои ги собираат топчињата со неа мораат да бидат многу прецизни, речиси за влакно. Таа има некои мали навики, кои собирачите на топчиња мораат да ги запаметат, како на пример дека топчето секогаш мора да и го даваме од иста страна и слично, додаде момчето.
Покрај добрите страни и навиките кои ги применуваат одредени тенисери, има и такви кои не оставиле добар впечаток кај младиот собирач на топчињата.
-Најлошо е да се биде на мечот со Енди Мареј. Тој може да биде многу непријатен на теренот, а тоа е пред се поради нервозата. Ниту Кирјос не е ништо подобар, откри Англичанецот.
Тој додаде дека сон на секое дете кое тренира тенис е да добие можност да ја работи оваа работа, но дека тренинзите се многу тешки поради кои не можат сите да издржат.
-Постои сериозна и многу строга подготовка за собирачите на топчиња на Вимблдон. Тоа е посебен турнир и така се подготвуваме и момците и девојките кои помагаат во текот на натпреварот. Многу е напорно. Тренинзите почнуваат уште во февруари и траат најмалку три месеци, Понекогаш тоа може да биде брутална подготовка. Тренинзите се навистина тешки, откри младиот собирач на топки.
