На сите вработени во здравствениот сектор им се забранува користење на годишен одмор како и платени и неплатени отсуства. Ваквата наредба е испратена до сите здравствени установи откако одлуката на Владата беше претходно објавена во Службен весник.
Според информации кои ги добила телевизијата „Сител“, на некои медицински лица од Клинички центар им било кажано дека не можат да користат боледувања ниту слободни денови за приватни обврски, а дополнително по потреба ќе им биле зголемени и часовите за дежурства.
Со владина одлука се стопираат и специјализациите и субспецијализациите на сите вработени во Здравствен дом – Скопје и истите треба да се вратат на своите работни места.
По реакцијата на околу 250 приватни специјализанти дека немаат здравствено осигурување, а треба да лекуваат ковид пациенти, министерот за здравство Венко Филипче изјави дека ќе се иницираат законски измени за да се реши ваквиот проблем.
Филипче уште еднаш предупреди дека ситуацијата со коронавирусот е сериозна и упати апел до граѓаните да бидат внимателни.
„Состојба е крајно сериозна, да не се излегува од дома ако нема потреба, само до маркет, до работното место или училиште. Само солидарни и одговорни можеме да се справиме со оваа криза“, изјави министерот.
По зголемување на бројот на пациенти на кои им е неопходна хоспитализација и исполнетоста на сите кревети на Инфективна и во модуларната болница, Филипче најави дека од утре на располагање ќе бидат дополнителни 150 кревети на интерните клиники на Гастро, Очно и Неврологија.
