Од завчера во македонските медиуми, но и на социјалните мрежи доста актуелна е свадбата на внуката на Амди Бајрам. Екс пратеникот со долги години стаж во политиката, кој е докажан во организирање семејни прослави и забави, повторно си остана доследен.
Кога веќе не можеше да направи свадба во Македонија, тој реши сепак истата да се одржи, но надвор од границите на нашата држава.
Актуелен претседател на Сојузот на Роми, Амди Бајрам свадбата на својата внуката Перјан за рекордни шест дена успеа да ја организира во Истанбул, Турција, и да ја исполни желбата на внуката и на најблиските.
Амди покажа уште еднаш дека не штеди пари за своите најблиски кога станува збор за прослави.
Како што појасни во телефонски разговор за ,,Фокус” минатата недела, повеќе од една година се подготвувале за свадбата на Перјан, која го носи името на неговата сопруга.
Поради мерките за заштита од корона вирусот, морале да одлагаат, и се надевале дека до октомври ќе им се даде зелено светло, па дури и испечатиле свадбени покани. Но, кога им било посочено дека не смеат да прават свадба, тие се помириле и ја откажале.
Мораме да ги почитуваме препораките на власта. Во никој случај не сакаме да биде загрозено нечие здравје, иако веќе долго време чекаме – изјави Амди.
Инаку, венчавката на Перјан која се случила во септември, била исто раскошна како свадба, со музика, многу гости, свечени тоалети. Сепак, тоа било само венчавка, а свадбата ја планирале како уште поголем настан.
За ,,Фокус”, Бајрам потврди дека моментално се забавуваат на свадбената веселба која се одржува на брод со 600 гости. За него, најважно е тоа што има свадба, а во исто време не ги прекршил законите во земјава.
-Имаме 370 гости од Македонија и 230 гости од Турција. Имам доста турски политичари овде, од кај претседателот Ердоган, од политичкиот врв, од кај нас политичари нема на забавата.
Се забавуваме на брод на Босфор, атмосферата е прекрасна. Се организиравме за кратко време со помош на пријателите на Ердоган. Кога ќе се вратиме назад, ќе споделиме фотографии и снимки од овој убав настан – изјавил Бајрам.
Перјан Бајрам е вистинска убавица и од снимките и фотките што ги сподели самата на Инстаграм може да се забалежи дека делува навистина грациозно.
На нејзиниот профил на Инстаграм кој е отворен за јавноста може да се види дека таа живее живот на висока нога на кој може да му позавидат многумина.
Може да се забележи дека доста патува, а неодамна била во Франција, поточно Париз.
