Француската агенција за развој ќе почне да дејствува во земјава

Француската агенција за развој ќе почне да дејствува во земјава. Во тек се преговори за постигнување договор со Владата, соопшти амбасадорот на Франција, Кристијан Тимоние, кој синоќа ја посети Општина Крива Паланка по повод 7. Франкофонска вечер.

Како што објасни Тимоние, Агенцијата дејствува самостојно, со финансиска поддршка од владата на Франција и тоа: како банка која нуди поволни кредити до ниски каматни стапки, дава донации, но и експертизи за изработка на проекти.

Агенцијата за развој нуди мерки за одржлив развој, животна средина, образование, поголема вклученост на жените во јавниот живот,… Работи со поддршка на големи проекти од над 10 милиони евра, а има на располагање околу 11 милијарди евра за сите држави во светот.

– Доаѓам од состанок со премиерот Заев и носам одлични вести за вашата држава. Француската агенција за развој ќе почне да дејствува во Северна Македонија.Во тек се преговори за постигнување договор со Владата. Агенцијата за развој финансира значајни проекти за развој на туризмот, она што при посетата претходно нагласивте дека е важно за општината, зимски спортови и друго, а сега ќе биде полесно, зашто го имаме инструментот. Тоа ќе биде достапно откако ќе се потпише договор.Во овој момент сакаат да видат за какви проекти станува збор, а потоа ќе се разговара на ниво на Влади и во амбасадата, рече Тимоние на средбата со градоначалникот Борјанчо Мицевски.

Според амбасадорот, Агенцијата повеќе ќе се фокусира на Балканот откако претходно вложуваше во Азија и Африка.

-Ова е за вашата држава конкретна придобивка за помош на патот кон ЕУ, додаде Тимоние.

Мицевски рече дека поддршката на државата од страна на Франција на сите полиња е добредојдена.