Вчерашниот рекорд од 1193 инфицирани во едно деноноќие навестува дека пандемијата нема намера да попушти.
Статистиката вели дека дури 6400 лица заболеле од вирусот само во последната седмица. Во рок од 4 дена, пак, два пати беше надминат бројот од 1000 случаи.
Галопирчкиот скок на случаи според микробиологот Пановски се должи на две причини – големите групиранки во затворено, но и мутацијата на вирусот на глобално ниво.
„Отприлика 70 проценти од соевите на вирусот што циркулираат низ светот имаат таква мутација која им ја зголемува трансмисивноста. Тоа е едно објаснување зошто во целиот свет, особено во Европа има многу заболени. Второ објаснување е есента во која се вообичаени респираторните инфекции, кога луѓето се во затворен простор и многу полесно ја шират болеста отколку надвор. Затоа за 5-6 пати веднаш се зголеми бројот.“вели проф. Никола Пановски, микробиолог.
Од 12000 активни случаи безмалку половина се во главниот град, кој е убедлив на корона пиедесталот и брои 5700 активни случаи. Го следат Тетово и Прилеп. Во неславната петорка влегоа Велес и Струмица која сега го плаќа данокот од неодамнешните журки во дискотеките и кафулињата каде КОВИД мерките беа мисловна именка.
АКТИВНИ СЛУЧАИ НА КОВИД-19 ВО МАКЕДОНИЈА
Скопје – 5668
Тетово – 726
Прилеп – 648
Струмица – 586
Велес – 542
Девет скопски општини имаат троцифрен број на КОВИД позитивни. Најголемото жариште е во Аеродром кој полека и се приближува на илјадарката.
КОВИД ЖАРИШТА ВО СКОПЈЕ
Аеродром – 937 активни случаи
Карпош – 805 активни случаи
Центар – 762 активни случаи
Гази Баба – 757 активни случаи
Кисела Вода – 699 активни случаи
Пановски предвидува дека не ни бегаат билтени во кои ќе бележиме и по 2000 случаи дневно, па смета дека единствен спас е полициски час.
„Од 22 до 5 часот наутро да е се затворено мислам дека нема да има влијание врз економијата. Други полициски часови не ни бегаат. Ако не се преземат мерки со ваков број на нови случаи кој може да оди и до 2000 и повеќе, да не збориме колку од нив не се откриени, заедно со контактите, пак влијае на економијата. Денеска имате помали фирми со помал број на вработени кои се десеткувани, не можат да работат – кадарот е дома.“вели проф. Никола Пановски, микробиолог.
Сепак, жртвите од КОВИД остануваат најболната точка во битката со невидливиот непријател. Згаснаа речиси 1100 човечки животи. Најцрниот ден беше завчера кога починаа 24 лица.
