Иако шпекулациите дека Езџан Алиоски има договор со Галатасарај и се чека само крајот на сезоната беа гласни, сега таа опција е подалечна од што се очекуваше. Бекот кому договорот со Лидс Јунајтед му истекува ова лето ќе биде слободен играч, а интерес за него постои.
Покрај Галатасарај, од Турција го посакуваат и Трабзонспор, па токму поради тоа играчот е топ-тема во тамошните медиуми. Токму „Хабер61“ кој е близок до Трабзон, изнесе сензационална вест од за нив блиски извори.
Наводно, за потписот на Алиоски се интересира и италијанскиот гигант Милан. Бидејќи ќе биде слободен агент, Џани перфектно би се вклопил како замена за Тео Хернандез. Засега италијанските медиуми не се огласиле на оваа тема, но ако има вистина во овие наводи, Македонија може да добие уште еден играч во калчото, а воедно и прво име во таборот на Милан.
Овој потенцијален трансфер нема да гарантира минутажа за Алиоски, па непознато е дали тој воопшто би прифатил да биде резерва. Сепак, повик да заигра за Милан кој по долго време се врати во Лигата на шампионите е нешто што тешко може да се одбие.
