Ноќеска пожар го зафати 200 години стариот Национален музеј во Рио де Жанеиро, еден од најстарите во Бразил, а пожарникарите и вработените се бореле да ги спасат уметничките дела.
Музејот во кој се наоѓаат колекции од Египет, грчко-римски артефакти и некои од првите фосили пронајдени во Бразил беше затворен за јавноста кога изби пожар синоќа во 19:30 часот според локално време.
“Засега нема жртви. Пожарот се прошири многу брзо, има многу запалливи работи во музејот”, рекол портпаролот на пожарникарите во Рио де Жанеиро.
Снимките од воздух на телевизијата Глобо покажуваат импозантна зграда, површина од 13.000 квадратни метри како со часови ја голтаат пламени. Иако пожарникарите брзо пристигнале пожарот се прошири на стотини сали во музејот уништувајќи сè пред себе.
Портпаролот на пожарникарите Роберто Робадеј рекол дека 80 пожарникари се борат со огнот и дека до полноќ според локално време пожарот бил под контрола, а се очекува дека ќе биде совладан за неколку часа.
Претседателот на Бразил, Мишел Темер рекол дека ова е “тажен ден за сите граѓани на Бразил”. “200 години работа, истражување и знаење е изгубено”, рекол Темер во соопштението.
Портпаролот на пожарникарите рекол дека некои експонати од музејот се спасени, а дека пожарникарите со помош на вработените успеале да отстранат повеќе работи од зградата.
Националниот музеј е отворен во 1818 година и е еден од најстарите и најпрестижните музеи во Бразил. Таа културна и научна институција има повеќе од 20 милиони вредни предмети.
