Во трката за вакцина против коронавирус е остварен уште еден голем успех откако американската биотехнолошка компанија „Модерна“ објави импресивни резултати од испитувањата на третата фаза.
Привремената анализа која беше објавена денеска, откри дека вакцината на „Модерна“ има ефикасност од дури 94,5%.
Компанијата соопшти дека сега планира во идните неколку седмици да се обрати до американските регулатори, до Управата за храна и лекови за одобрување на вакцината за итна употреба.
Ова е втора американска компанија која за само седум дена претстави вакцина со голема ефикасност против Ковид-19, а пред „Модерна“ тоа го направи компанијата „Фајзер“, чија ефикасност на вакцината изнесува нешто повеќе од 90%.
Покрај ефикасноста, вакцината на „Модерна“ се издвојува по уште една важна работа – не мора да се чува на екстремно ниски температури, туку е стабилна на температури од 2 до 8 степени Целзиусови 30 дена. Вакцината исто така може да се чува шест месеци на температура од минус 20 степени.
Вакцината на „Фајзер“ треба да се чува на -70, додека пак руската вакцина „Спутник“ која има ефикасност од 92%, треба да се чува на температура од -18 степени.
„Модерна“ до овие резултати стигна врз основа на тестирањата на 30 илјади волонтери, а сега ќе чека здравствените регулаторни тела во Соединетите Американски Држави да дозволат употреба на вакцината.
