Дијамант од 49 карати се наоѓа меѓу останатиот накит кој беше украден во спектакуларниот грабеж на музејот „Зелен трезор“ во Дрезден, на истокот на Германија.
Криминалците по кои германската полиција и натаму трага, успеале да украдат повеќе парчиња накит кои вкупно содржеле повеќе стотина дијаманти. Меѓу нив имало и меч чија што дршка имала 9 големи и 770 мали дијаманти, соопштија од музејот.
Вкупно биле украдени 11 парчиња накит, а исто така недостасуваат и поединечни делови од останатите изложени скапоцености.
Белиот дрезденски дијамант е еден од најскапоцените камења од личната колекција на поранешниот владетел на Саксонија, Аугуст Втори Силниот. Тој во 1728-ма година го купил дијамантот од речиси 50 карати.
Дијамантот кој сега е во рацете на криминалците во тоа време бил платен неверојатни 200 илјади талири, соопштија од музејот во Дрезден на својата интернет страница.
Управата на музејот „Зелен трезор“ и директорката Марион Акерман за германските медиуми изјавија дека вредноста на украдениот накит е непроценлива.