Традиционалната „Директна линија“ на која рускиот претседател Владимир Путин одговара на прашања кои телефонски му ги поставуваат граѓаните на Руската Федерација, деновиве се одржуваше по 17-ти пат.
Путин се осврна на бројни актуелни теми и порача дека веќе конечно доаѓа крајот на падот на платите во разни сектори ширум земјата, пад кој значително му наштети на неговата популарност. Рускиот претседател меѓу другото порача дека новата владина програма ќе обезбеди повисок животен стандард за сите граѓани.
За време на „Директната линија“, Путин го слушнал повикот на еден очаен граѓанин, кој се пожалил дека работи за месечна плата од 10 илјади рубљи, што е околу 130 евра (8,300 денари).
Како што пренесуваат руските државни медиуми, откако Путин го ислушал човекот, веднаш им наредил на надлежните да го истражат случајот и да ги преземат сите потребни мерки за помош, нагласувајќи дека таквата плата е противзаконска.
„Вистина е дека платите се во пад веќе неколку години. Најголемиот пад беше во 2016-та година, но приходите веќе започнаа постепено да растат. Пред неколку години се соочивме со неколку шокови, а тоа не беа шокови кои се поврзани со санкциите или надворешните ограничувања, туку со ситуацијата на пазарот на нашата извозна стока – нафтата, нафтените производи, гасот, металот, хемиските и некои други производи. Затоа се појави непријатна ситуација во економијата и социјалната сфера“, одговори Владимир Путин.
Рускиот претседател се осврна и на проблемите со санкциите кои што ги наметнуваат западните земји предводени од САД.
„Од 2014-та година Русија поради санкциите загуби 50 милијарди долари, Европа 240 милијарди долари, САД 17 милијарди долари, а Јапонија 27 милијарди долари“, изјави Владимир Путин.
Путин меѓу другото ги обвини Соединетите Американски Држави дека ја ставаат кинеската компанија Huawei на црната листа поради страв од конкуренција и заклучи дека односот на Западот кон Русија тешко дека ќе се промени.
