Привремено e запрено производството на електрична енергија од хидропотенцијалите на државата поради катастрофално нискиот водостој на вештачките акумулации за да се заштити животната средина и биодиверзитетот. Ова го одлучи Владата на вчерашната седница откако ја разгледа Информацијата за состојбата со природните езера и вештачките акумулации од АД ЕСМ има хидроелектрани, информираат од прес-службата на Владата.
„Со оглед на тоа што според сите показатели и споредбени просеци во изминатите 15 години, 2020 година е исклучително лоша во однос на хидролошката состојба, како и со оглед на поинтензивната работа на хидроелектраните во одреден период во последните неколку месеци поради елементарните непогоди во рудниците во РЕК Битола, водата во езерата се искористи во пообемна мера и секој понатамошен истек ќе го загрози еколошкиот минимум на котите, неопходен за живиот свет“, соопштија од Владата по состанокот на премиерот Зоран Заев и ресорните министри и директорот на ЕСМ, Васко Ковачевски.
На катастрофално нискиот водостој на вештачките акумулации како Мавровското, Тиквешко, Дебарското и другите езера што служат за производство на електрична енергија, укажуваа и екологистите, граѓаните и медиумите во текот на летово и есенва.
Водата од акумулациите летово засилено се користеше за производство на електрична енергија, иако надлежните од ЕСМ тогаш тврдеа дека е сè под контрола со вештачките езера и дека се внимава на биолошкиот минимум заради живиот свет во езерата.
За празните акумулации и стравичните слики на суви и испукани езерски брегови од ЕСМ минатиот месец се правдаа со хаваријата во копот на РЕК Битола и дека производството на струја морало да се надомести со користење на водните акумулации, но дека во текот на целата година, нивоата на акумулациите биле во рамките на пропишаните дозволени вредности според водостопанските дозволи.
Кон крајот на минатиот месец за големи помори на риба во Тиквешкото Езеро, како резултат на засиленото испуштање на водите од акумулациите на езерото за производство на струја алармираа неколку производители на тиквешки крап. Одгледувачите на риба тогаш предупредија на алармантно ниското количество кислород во езерото поради малото количество вода, само 2 милиграма на литар наместо вообичаените 5, и дека тоа ќе го уништи живиот свет во езерото.
– Климатските промени и долгиот сушен период си го направија своето, а Владата задоцнето реагираше, дури откако ни пресушија езерата – вели Ана Чоловиќ-Лешовска од организацијата „Еко свест“.
Таа вели дека сега е краен момент да се преземат одлучни чекори кон енергетска транзиција и зголемување на енергетската ефикасност, на која досега малку се обрнуваше внимание.
– Искрено се надеваме дека ја научија лекцијата, дека догодина навреме ќе преземе мерки да не дојде до вакви катастрофални последици – додава Чоловиќ-Лешовска.
