Хрватскиот биолог Горан Шафарек бил на експедиција на островот Северен Сентинел, кое во светот е попознато како остров на смртта, од кој никој не се вратил жив.
Целиот тој Андамански архипелаг е домородно подрачје и доаѓањето на странци е строго ограничено, но Шафарек како истражувач таму минал 3 месеци.
“Сите локални истражувачи со кои се дружевме не предупредуваа на тој остров. Никој од нив никогаш не отишол таму бидејќи се знае како би завршил. Бевме на делот од островот каде е дозволен престој. Само од далечина можевме да ги набљудуваме. Но ни на остатокот од островот не се нешто поблаги кон странците. Често моравме да минуваме преку територијата на племето Јарава”, вели тој.
“Вооружени стражари мораа да не чуваат од домородците”, објаснува Шафарек и додава дека сите тие племиња, како и оние од островот Сентинел, живеат како во камено доба. Единствено оружје им е лак и стрела, носат само крпи или не носат ништо, а некои антрополози тврдат дека не знаат ни да запалат оган. Но, племето од островот Сентинел и натаму опстанува.
“Таму се километри и километри џунгла. Комарци, крокодили, а да не кажам и кралски кобри и најотровната азиска змија краит, па потоа инсекти и друго. Како тие преживуваат и опстануваат таму, навистина е неверојатно и чудно.
Ако некој од странците е примен, веројатно племето би изумрело бидејќи нема имунитет на бактериите и вирусите на нашиот свет. Пред неколку години дури и беше забрането снимање на островот”, додава Шафарек.
Инаку, Северен Сентинел е дел од архипелагот Андаман во Бенгалскиот залив покрај Индија. На него веќе повеќе од 30.000 години живеат домородци кои не сакаат никаков контакт со остатокот од цивилизацијата.
Секој посетител “го поздравуваат” со отровни стрели, па на островот во последните години е забранет влез. Неодамна на тој остров бил убиен американскиот мисионер Џон Чау, а низ историјата биле забележани уште неколку убиства на странци.
