Европските потписници на нуклеарниот договор со Иран порачаа дека се „исклучително загрижени“ за нарушувањето на иранскиот нуклеарен договор.
Иранските власти порачаа дека ќе ги зголемат залихите на збогатен ураниум повеќе од тоа што е дозволено во нуклеарниот договор од 2015-та година. Поради ова, постои стравување дека Техеран ќе произведе нуклеарна бомба, а американскиот претседател Доналд Трамп порача дека „Иран си игра со оган“.
Додека САД неодамна се повлече од иранскиот нуклеарен договор, европските земји настојуваа да го одржат договорот „во живот“, но се чини дека договорот несопирливо се распаѓа.
„Жалиме поради одлуката на Иран која го доведува во прашање главниот инструмент за нуклеарното ограничување. Го повикуваме Иран да се откаже од овој потег и да се воздржи од понатамошните чекори кои го нарушуваат нуклеарниот договор“, порачаа министрите за надворешни работи на Германија, Франција и Велика Британија.
Додека тензиите помеѓу Вашингтон и Иран растат, а европските држави веројатно веќе и се свесни дека нуклеарниот договор е пред распад поради зголемувањето на капацитетите на збогатен ураниум од страна на Иран, спротивно од договореното, Израел призна дека веќе се подготвува за војна.
Израелскиот министер за надворешни работи, Израел Кац изјави на меѓународниот безбедносен форум дека Иран би можеле да се најдат во таканаречената „сива зона“.
„Треба да се земе во предвид дека погрешните пресметки на иранскиот режим би можеле да доведат до премин од „сивата зона“ во „црвена зона“, односно да дојде до воен судир“, изјави шефот на израелската дипломатија.
„Ние мораме да бидеме подготвени за тоа и затоа израелската држава продолжува да биде посветена на изградбата на својата воена моќ во случај да мора да одговори во едно сценарио на ескалација на конфликтот“, изјави израелскиот министер Кац.
