Пред повеќе од десетина дена пејачот Александар Ристовски ја претстави песната „Животот е како игра“ на јавноста. Овој рефрен е негово музичко деби, а со оглед на тоа што од премиерата на големо се коментира и пишува за видеото и темата, нашата екипа реши да го контактира Александар се со цел поблиску да ви го претстави и да ве запознаеме подобро со него. Еве што се’ ни откри овој талентиран музичар кој веќе неколку години живее на релација Швајцарија – Македонија…
Неодамна во етер излезе твоето деби, односно песната „Животот е како игра“. Колку си задоволен од тоа како минува песната кај публиката?
Морам да бидам искрен и да кажам дека сум презадоволен од тоа како публиката ја прифати песната „Животот е како игра“. Многумина се пронајдоа во неа, а тоа беше и мојата цел. Пресреќен сум што ова мое деби наиде на позитивни реакции и критики, добар старт кој се надевам ќе го оправдам и со останатите песни на кои работам во моментов.
Од каде идејата и инспирацијата за „Животот е како игра“?
Идејата за да ја напишам оваа песна дојде сама од себе од искуството поминато во животот.Кој игра тој добива, а во овој случај јас ја добив оваа убава песна и започнав нова игра и кариера во животот.
Што следува после оваа песна, веројатно нема да застанеш овде и наскоро планираш нешто ново?
Имам напишано нова песна, можам да го ви го откријам насловот но со мали исправки ќе ја изнесам во продукција и ќе ја завршам музиката. Секако не застанувам тука, новата песна ќе го носи насловот „Да можам да го вратам времето“. Наскоро следуваат детали!
Кој е приватно Александар, што работи, што го исполнува?
Освен музиката јас професионално се занимавам со електрика. Работев 15 години електро, а после преселувањето во Швајцарија решив да направам мала промена и електриката ја ставив во втор план. Започнав да се занимавам со трговија со која веќе активно работам повеќе од 3 години. Обично работам 5 дена во неделата и практикувам за викенд да шетам. Живеам во земја каде што има што да се види. Тоа ме исполнува, викендот да го користам за уживање низ Швајцарските планини и реки.Еднаш неделно имам и спорски активности.
Повеќе од пет години активно се занимаваш со музика, но дури сега реши да објавиш песна, зошто чекаше толку долго?
Идејата после долго време да снимам песна не беше од денес за утре. Таа желба од секогаш постоела во мене. Животот кон други погледи и обврски не ми дозволија да имам храброст и моќ да го направам тоа. Не бев вложен само во музиката, вложував во големи инвестиции кој сега веќе ми се завршени и можам да се опуштам и да си дозволам повеќе средства за вложување во мојата музичка кариера и комплетно да го опремам моето музичко студио.
Паралелно си и клавијатурист во една група во Швајцарија. Што работиш со тој бенд?
Имам основано група во Берн , се вика „Стринг Арт“. Јас свирам аранжер клавијатура, сакс свири Дарко и вокал е Оливер. Настапуваме на приватни забави низ сите градови во Швајцарија, а најмногу во кругот на главниот град Берн каде што и живееме. Доаѓаат и гости од Македонија, од македонската музичка естрада кои соработуваат со нас. Презадоволни сме од функционирањето и настапите на бендот.
Три работи без кои што не можеш да го замислиш животот?
Тоа дефинитивно би биле љубов, семејство и музика.
Позната дама со која што би сакал да соработуваш музички во иднина?
Мислам дека мојот глас – баладицно вибрато, најмногу би се вклопил и би одговарал со Каролина Гочева, па затоа таа е мојот музички избор за соработка.
Порака до сите читатели, кое е твоето мото, кој е твојот рецепт за насмевка и среќа?
Човек кој ги прави другите среќни, не може да биде несреќен. Живеј за денес, бидејќи вчера нема да се врати. Она што го прави животот интересен, е можност да го остварите вашиот сон.Бидете среќни со она што го имате додека се борите за она што го сакате. Не е важно дали луѓето фрлаат камења по вас, најважно е што градите со нив, ѕидови или мостови.Бидете секогаш позитивни љубете и работете на себе. Така ќе дојдете до успех!
