Легендарниот шпански судија кој веќе неколку години е во пензија, Итуралде Гонзалес стандардно дава свои експертски мислења за мадридскиот весник „АС“, а со оглед на тоа што изминатава ноќ се крена огромен прав околу ВАР пеналите кои му беа досудени на Реал Мадрид, поранешниот најдобар арбитар од оваа земја излезе со свое објаснување за виденото во Валенсија.
Првиот пенал кој го направи нашиот Енис Барди може да се свири во секоја ситуација според правилникот на ФИФА, но сепак огромна дебата предизвика вториот пенал со кој Реал Мадрид стигна до победа од 1:2 над Леванте. Повторените снимки ни покажуваат дека Дукуре комплетно ја промаши целта, но Касемиро го искористи неговото невнимание за да се фрли на земјата и да изнуди најстрога казна. Главниот судија Иглесиас Вилануева веднаш покажа на белата точка, но нејасно е зошто ВАР не го поништи овој смешен пенал кој го окаратеризираа како непостоечки и двата најпознати мадридски медиуми „Марка“ и „АС“.
Итуралде се обиде да објасни зошто луѓето од ВАР собата не реагирале во дадената ситуација, а со својот одговор го доведе во прашање функционирањето на ВАР системот во Шпанија.
– За мене ова во ниту еден случај не е пенал. Касемиро се фрли и ова не смее да биде пенал. Дукуре шутна во празно и не го допре Касемиро. Треба една работа да биде јасна. Ако судијата не досудеше пенал, ВАР немаше да интервенира. Главниот судија сметаше дека станува збор за чист пенал и поради тоа го досуди. Луѓето во ВАР собата очигледно видоа мал контакт и поради тоа не беше корегирана одлуката на Вилануева, – објаснува Гонзалес.
