Французинот Нејтан Полин премина шреку јаже на височина од 70 метри над Сена во Париз, проследено со бурно навивање на набљудувачите на Ајфеловата кула и на бреговите на реката.
Врзан за безбедносно јаже, 27-годишниот Полин полека одеше по јажето испружено преку реката помеѓу Ајфеловата кула и театарот „Шело“.
Застанал неколкупати за да се одмори и да направи пауза седејќи или лежејќи на јажето.
– Не беше лесно да одам 600 метри и да се концентрирам со притисокот и со сѐ што се случуваше наоколу. Но, секако беше прекрасно – рекол Полин, пренесе „Гардијан“.
Тој вели дека било тешко да се добијат сите неопходни дозволи за овој потфат, а дека голем притисок претставувал и „стресот поврзан со публиката и фактот дека имало многу луѓе“.
Полин, сопственик на неколку светски рекорди, го изведе овој премин над реката со цел да го одбележи Денот на наследството, кој се слави секоја година во Франција, кога луѓето се поканети да ги посетат зградите и спомениците кои инаку се затворени за јавноста.
Тој вели дека неговиот мотив бил „да направи нешто убаво и тоа да го сподели со луѓето, а во исто време да посочи новата перспектива на наследството“.
