Јапонија размислува да воведе работна недела од 4 дена за да го подобри квалитетот на животот на луѓето, соопштиле властите.
Се надеваат дека оваа шема исто така ќе го унапреди туризмот во земјата која се бори со пандемијата на коронавирусот и која е веќе добро позната по тешката работа и непрегледните работни часови.
Катсунобу Като, шеф на кабинетот на јапонскиот премиер, рекол дека размислува за воведување на три слободни работни денови неделно, односно за продолжен викенд.
“Важно е да се промовираат различни работни стилови за да се балансира меѓу животот и работата”, рекол тој.
Освен тоа, Јапонците сами ќе можат да донесат одлука кои три дена ќе им бидат слободни. Като истакнал дека во текот на тие три дена граѓаните би можеле да им се посветат на децата, постарите или на здравјето.
Се надеваат дека Јапонците би можеле повеќе да патуваат, што ќе помогне на домашниот туризам, но и дека подолго ќе се задржуваат на одредени работи, наместо често да даваат откази, пренесува “Daily Mail”.
Компанијата “Microsoft Japan” во 2019-та година спровела експеримент, а работната недела од 4 дена покажала дека кај работниците пораснала продуктивноста. Според податоците, работниците вршеле 40 проценти повеќе работа. Иако овој тест минал добро, идејата за 4-дневна работна недела не заживеала и официјално.
Од друга страна, поединци сметаат дека 3 слободни дена неделно би можеле да доведат до намалување на платите, а дека работодавците би можеле да го зголемат бројот на работни часови во текот на преостанатите работни денови.
