Полицијата открила траги од крв, како и фрагменти од коски, во специјалниот бункер на стадионот ФК Партизан, што го користеле Вељко Беливук (35) и неговиот клан.
Ова упатува на сомнеж дека мафијашите брутално ги мачеле и касапеле своите жртви, а некои од нив можеби биле убиени на стадионот на ЈНА. Влезот во специјалниот бункер, како што објасни изворот од истрагата, се наоѓа во градината на ресторанот на стадионот на Партизан. Само Беливук и неговите најблиски соработници ги имаа клучевите на бункерот.
При претрес на тие простории, пронајдени се пакувања од бибер спреј, клучеви од полициски лисици, бројачи за банкноти, како и најмодерни попречувачи на сигнали за мобилни телефони. Сепак, она што особено ги изненади инспекторите е откривањето на четири целосно нови гумени чекани, како и парчиња облека, на кои биле откриени траги од крв. Исто така, форензичката анализа открила траги од прскање крв на зидовите, како и фрагменти, мали делови од човечки коски – открива изворот.
Според него, сè укажува на тоа дека Веља Невоља, Марко Миљковиќ и другите членови на кланот и службените простории на Партизан ги користеле за монструозно мачење и колење на жртвите.
Се претпоставува дека нивните гумени чекани биле користени за мачење. Според она што досега е откриено за активностите на кланот, по секоја употреба, чеканот се фрлаше и гореше, па се користеше нов за следната жртва. Покрај чеканите, во бункерот се пронајдени телескопски палки, како и неколку ножеви, сите испратени на детална анализа – вели изворот.
Во последната година и половина, повеќе од десет лица исчезнаа, за кои има сериозни индиции дека биле киднапирани, а веројатно и убиени по наредба на Беливук.
Прегледот на снимките од видео надзорот од бункерот на Веља на стадионот утврди дека двајца мажи од списокот на исчезнати лица биле донесени во тие простории, и повеќе не се видени. Двајцата најверојатно биле мачени и убиени во бункерот, а потоа нивните тела биле распарчени и однесени во вреќи на тајно место, вели изворот од истрагата.
Интересно е дека на истиот стадион се случи и големиот инцидент со знамето на Голема Албанија на фудбалскиот натпревар меѓу Србија и Албанија. Тогаш за малку беше спречено да настане хаос од големи размери на улиците на Белград.
