Кинеската потенцијална забрана за извоз на ретки метали би можела прилично да ја загрози американската воена индустрија, со оглед на тоа што околу 400 килограми на ретки метали од Кина се потребни за производство на само еден борбен авион од типот „Ф-35“.
Кинеските медиуми пренесуваат дека властите од Пекинг сериозно ја разгледуваат можноста за стопирање на извозот на ретките метали во САД, а тоа би било нивен одговор на царините и останатите економски притисоци кои што доаѓаат од администрацијата на американскиот претседател Доналд Трамп.
Доколку дојде до ова, еден ваков потег на Пекинг би можел да предизвика големи проблеми за прпизводството во американската воена индустрија, посебно во производството на високите технологии.
Имено, новиот американски најнапреден борбен авион од петта генерација „Ф-35“, кога станува збор за производството, прилично е зависен од ретките метали кои се увезуваат од Кина, пренесува “Bloomberg”.
Во извештајот на споменатиот медиум е наведено дека еден „Ф-35“ авион користи околу 417 килограми ретки земјени метали кои што Американците ги увезуваат токму од Кина.
Кинезите, доколку би сакале, би можеле да им создадат големи проблеми, но засега, освен шпекулации во медиумите, нема никаква најава дека официјален Пекинг би можел да го сопре извозот на металите, кој што исто така е во интерес и на Кина.
Да потсетиме, Кина произведува околу 95% од глобалната побарувачка на ретки метали и ги има најголемите резерви на светот.
