Кина не се плаши иако во една трговска војна сите страни губат – но, ова е сиров економски тероризам, порачаа од Пекинг.
Високиот кинески дипломат, заменик министерот за надворешни работи Жанг Ханхуи, порача дека ова што САД ѝ го прави на Кина е „сиров економски тероризам“, остро критикувајќи ги американските притисоци во трговската војна помеѓу двете земји која не се смирува.
Да потсетиме, преговорите помеѓу Пекинг и Вашингтон околу потенцијалниот трговски договор практично се распаднаа во текот на овој месец, откако администрацијата на американскиот претседател Доналд Трамп ги обвини Кинезите дека се откажале од ветувањата во врска со структурните промени на економската пракса.
Набрзо после тоа, властите од Вашингтон воведоа нови царини од 25% на околу 200 милијарди кинески производи кои се увезуваат во САД, а Пекинг возврати со иста мера.
Во вчерашниот говор во Пекинг, Жанг Ханхуи порача: „Се противиме на трговската војна, но не се плашиме. Но, ваквите намерни провокации се сиров економски тероризам, економски шовинизам и економско малтретирање“, порача заменик министерот за надворешни работи на Кина.
Тој порача дека во една трговска војна, јасно е дека сите страни губат: „Оваа трговска војна ќе има сериозни негативни последици по глобалниот економски развој и опоравување“.
