Пред 19 години Луис Фиго ја налути цела Каталонија откако ја напушти Барселона и се пресели во најлутиот ривал Реал Мадрид.
Веројатно тоа никогаш нема да му го простат иако португалскиот ас, кој истата година ја освои Златната топка, си има свои причини за трансферот. Речиси две децении подоцна откри кои се тие.
„Кога сакате промена, секогаш сакате најдобро за себе. Првата логична промена во мојата кариера беше преминот од Португалија во Шпанија бидејќи бев млад и барав нов предизвик. Одлуката за трансфер во Реал дојде од неколку причини. Сакав трофеи и сакав да напредувам во сите сегменти: финансии, трофеи, престиж… Затоа подоцна заминав и во Интер“, откри Фиго.
Во Реал остана пет сезони, а и со него и со Барса освои по седум трофеи. Разликата е во тоа што со „кралскиот клуб“ дојде до најдрагоцениот – во Лигата на шампионите. Многу работи се сменија во овие 19 години, но тој остана запаметен како најголем предавник во историјата на шпанскиот фудбал.
