Два натпревара, четири бода и одлична атмосфера во македонската репрезентација на стартот од квалификациите за Европското првенство во 2020 година.
По убедливиот триумф против Летонија во првото коло, нашите фудбалери ремизираа на гостувањето кај Словенија со 1-1 и ги имаат сите услови да се борат за едно од првите две места кои водат на континенталниот шампионат. Она што најмногу импонира е што овие фудбалери немаат респект кон никого, играат своја игра и никој против нив не може да каже дека е фаворит.
Во некои други времиња водство на противничката селекција, која притоа е и домашна, ќе значеше шок за нас од кој немаше да се опоравиме до крајот. Така беше во Љубљана синоќа, Зајц го отвори резултатот иако Словенците немаа којзнае каква иницијатива. Но, нашите фудбалери продолжија да играат, а на стартот од вториот дел дојде наградата за тоа по голот на Барди.
Двете репрезентации имаа можност да дојдат и до преостанатите два гола, но се чини дека ваквиот исход е најреален. Македонија ја очекуваат дуели на домашен терен против Полска и Австрија во јуни, евентуални победи дополнително ќе ја загреат атмосферата.
