Македонската фудбалска репрезентација го доживеа првиот пораз во квалификациите за ЕП 2020, откако синоќа загуби од Полска (0:1) пред своите навивачи на арената „Тодор Проески“ во Скопје.
Иако гостите ја оправдаа фаворитската улога, во првото полувреме и Полска немаше посериозна закана кон голот на Димитриевски. Но, едно големо невнимание во одбраната на стартот на вториот дел (47. минута) донесе гол за Пјонтек кој со многу среќа го совлада македонскиот голман, со што обезбеди предност за полскиот состав.
Во продолжение Полска имаше уште неколку шанси да обезбеди помирен финиш, а нашата репрезентација во завршницата не ги искористи своите неколку шанси да избори барем реми од овој дуел.
По овој пораз, Македонија е на третото место во својата група со четири бодови по три одиграни натпревари. Израел е подобар со седум, додека Полска има максимални девет бодови.
