Филмовите се одличен начин квалитетно да се пополни слободното време. Но, мора да признаеме дека има некоја особено убава магија во гледањето серии.
Особено кога имате доволно време, интересна серија и многу достапни епизоди, тогаш навистина не знаеме да кажеме стоп и да направиме пауза.
Сите кои сте го дочекале утрото будни со серија којашто сте започнале да ја гледате пред десетина часа, а веќе сте „смачкале“ една сезона ќе ја сфатите манијата на гледање ТВ серии.
Ви предлагаме 10 релативно нови фаворити од различни жанрови, а вам ви останува да се изјасните дали веќе ги гледате или планирате да поминете неколку бессони ноќи:
Мистерија – Deception
Камерон Блек е познат магионичар кој со години го изведува трикот кој ги збунува и воодушевува сите. Но, неговата тајна е разоткриена. Откако ќе ја изгуби славата и популарноста тој им се придружува на ФБИ нудејќи ја неговата помош во решавање случаи, додека има сосема друга агенда која мора да ја оствари по секоја цена.
Романтична комедија – Life sentence
Стела е млада и умира од рак. Сите нејзини одлуки како и оние на нејзиното семејство се вртат околу нејзината болест. Но, одеднаш дознава дека е излечена. Како да му се врати на животот откако ќе сфати дека не постои повеќе опасност од смрт?
Супер-херојски според стрип – Marvel’s Jessica Jones
Џесика Џонс не е типичен супер херој, таа е мрачна, цинична и има проблеми со алкохолот. Нејзиниот и онака разнишан свет полека се руши кога опасна личност од нејзиното минато се враќа по неа и предизвикува општ хаос.
Хорор – Dark
Она што е Stranger Things за американскиот пазар, тоа е Dark за европскиот. Две деца кои живеат во мало германско гратче одеднаш исчезнуваат. Прашањето е – каде се? Што се случило со нив? Трагедијата ги погодува нивните најблиски, но и градот над кој очигледно демне опасност.
Научна фантастика – The Crossing
Бегалци од војна почнуваат да се појавуваат барајќи азил во американски град. Проблемот е во тоа што тие доаѓаат од иднината. Цели 180 години пред нашето време.
Комедија – The Good Place
Еленор се буди и сфаќа дека е мртва. Таа е во рајот, или „доброто место“ каде што припаѓаат сите добри луѓе. Постои само еден проблем – Еленор не е воопшто добра личност. Наскоро сфаќа дека завршила на доброто место поради нечија грешка.
Драма – The Good Doctor
Шон Марфи е генијален млад хирург кој започнува со работа во една престижна болница. Но, тој е прилично ексцентричен лик, бидејќи има форма на аутизам и Савант синдром, што му ги отежнува работите на колегијален и приватен план.
Фантазија – The Gifted
Светот во кој постојат нормални луѓе и мутанти е во хаос. Мутантите се третираат како непријатели, со страв и недоверба. Специјален институт за мутанти сепак претставува зрак надеж дека ќе ги подобри односите меѓу двата вида и ќе постигне мир.
Крими-трилер – Mindhunter
Кон крајот на ’70-тите години од минатиот век, двајца агенти на ФБИ ја прошируваат својата експертиза со профилирање на криминалците, односно навлегување во нивната психологија и ум. Тие полека започнуваат да се приближуваат кон чудовишта кои само имаат облик на луѓе.
Мини-серија (документарен филм) – Planet Earth II
Вистинско ремек-дело, за сите кои ја сакаат природата, земјата и животните. Ќе уживате во 6 епизоди на нараторот Дејвид Атенбороу со приказни и визуализации кои буквално го одземаат здивот.
