Најмалку 19 лица се убиени, а над 40 се ранети во вооружен напад во трговски центар во Ел Пасо, град во американската сојузна држава Тексас.
Како што пренесуваат американските медиуми, полицијата привела едно лице осомничено за нападот. Според „СиЕнЕн“, станува збор за 21-годишниот Патрик Крусиус.
Засега не е точно познато дали станува збор само за Крусиус, или пак во нападот учествувале повеќе лица, затоа што неколку американски медиуми пренесоа дека покрај пукотниците во трговскиот центар „Сиело Виста“, наводно биле слушнати пукотници и во соседниот супермаркет „Волмарт“.
Портпаролот на локалната полиција непосредно после нападот за тамошните медиуми потврди дека полицијата привела едно лице поврзано со вооружениот напад во Тексас.
Градоначалникот на Ел Пасо, Ди Марго претходно изјави дека биле приведени три лица, но началникот на локалната полиција Роберт Гомез набрзо потоа откри дека е приведено само едно лице и полицијата верува дека нападот го извршил сам.
„Ситуацијата е флуидна и динамична. Засега не мислиме дека има повеќе осомничени, но тоа би можело да се промени“, изјави Гомез.
„Пребаруваме и низ „Волмарт“, но и во околниот трговски центар. Всушност го пребаруваме целото подрачје. Нема активна пукотница, но не можеме да потврдиме дека подрачјето е безбедно во овој момент“, изјави портпаролот на локалната полиција Енрике Кариљо, кој додаде дека се убиени околу 20 лица, но и дека не може да го потврди точниот број на настрадани.
Во САД продолжуваат насилствата и масовните убиства кои што ја потресуваат земјата веќе со години. Минатиот викенд напаѓач уби четири лица и рани 12 на годишен фестивал на лукот во Гилрој, Калифорнија.
Американскиот претседател Доналд Трамп се огласи на Твитер и порача дека масовното убиство во Ел Пасо е „многу лошо и има многу убиени“.
