Во екот на кризата на доверба, аргентинскиот пезос изгуби речиси 20 отсто од својата вредност во однос на доларот, и тоа за само два дена. Ваквата ситуација ја натера централната банка на Аргентина да ја подигне својата референтна каматна стапка на 60 отсто.
Аргентинскиот претседател Маурицио Макри, под чија влада само во текот на оваа година пезосот изгуби повеќе од 40 отсто во однос на американскиот долар, изјавил дека овој потег е насочен кон обновување на довербата во тамошната економија.
Вчера, пезосот опаднал за повеќе од 13 отсто во однос на доларот по падот од околу 7 отсто претходниот ден и завршил на своето најниско ниво некогаш – 39,2 за еден долар. Од почетокот на годината, пезосот опаднал 51,85 отсто во однос на доларот, предизвикувајќи големи интервенции во тамошните централни банки. Падот на курсот на валутата предизвика зајакнување на инфлацијата која во јули изнесувала 31,2 отсто на годишно ниво.
Криза по криза
Се чини дека третата економија во Латинска Америка е на раб на нервен слом бидејќи никако не може да се ослободи од циклусот на финансиски кризи кои ја погодуваат оваа деценија. Последната криза која се случи во 2002 година поради неможноста за отплата на странските долгови, “фрлила” милиони аргентински граѓани од средниот слој во сиромаштија.
Падот на пезосот ја поттикна Аргентина да побара кредит од 50 милијарди долари, а во склоп на јунскиот договор, аргентинската влада ветила дека ќе ги забрза плановите за намалување на фискалниот дефицит.
Но, бидејќи валутата продолжува да тоне, поскапувајќи ја отплатата на аргентинските долгови, инвеститорите се загрижени дека помошта од фондот можеби нема да биде доволна.
