Германската канцеларка Ангела Меркел очекува деновиве да се реши прашањето за пристапните преговори на Македонија со Европската унија.
Таа во одговор на прашање во Бундестагот кажа дека е во контакт со бугарскиот премиер Бојко Борисов и се надева дека ова прашање наскоро ќе биде решено.
-Не успеавме секаде да постигнеме пробив, на пример за почеток на преговорите со Македонија. Тоа е штета и уште еднаш доживеавме една злоупотреба на позицијата на една земја- членка против една земја-кандидат со наметнување на билатерални барања. И, мора јасно да се каже, со вршење притисок. Како ги оценувате шансите во блиска иднина да се надмине блокадата на Бугарија, запраша Крихбаум.
Меркел на тоа одговори дека е во контакт со бугарскиот премиер Бојко Борисов.
-Уште еднаш разговарав со бугарскиот премиер Бојко Борисов и се надевам дека овие прашања ќе се надминат во блиска иднина, рече германската канцеларка.
Амбасадорите на земјите членки на ЕУ вчера попладне ги усвоија заклучоците за пропишување со западен Балкан, откако во нацрт-текстот беше вметната реченицата „погрешно толкување на историјата“, на што инсистираше Бугарија како компромис за да го одблокира нивното донесување, а од македонската влада реагираа дека со потврдата на ветото од Бугарија, изневерени се европските вредности и очекувањата на македонските граѓани.
