Во Скопје почна да се изведува концептот за покриви засадени со трева и дрвја. На врвот на зградата може да има и патеки, разна вегетација, жардиниери со цвеќиња, со што дополнително се поттикнуваат нови еко идеи за презаситеноста на скопјани од бетон и асфалт.
Наоѓањето решение за проблемот со загадувањето не е едноставно и лесно. Но постојат начини што можат малку да го ублажат. Еден од нив е концептот на зелени (градини) покриви. Вакви иницијативи за подобрување на животната средина, во одредени држави одамна се реализираат. На некои од нив целта не им е само подобрување на квалитетот на воздухот туку и намалување на емисијата на јаглерод диоксид.
Со зелениот покрив се подобрува климата, се намалува прашината, се задржува водата при врнежи, се подобрува и звучната изолација, а најважно е што навистина се чувствува разлика во воздухот што го дишеме.
Објекти со зелени покриви во Скопје
Низ градот можат да се забележат неколку вака облагородени индивидуални куќи, станбени и комерцијални објекти. Мини-градина го разубави и покривот на зградата спроти соборниот храм „Св. Климент Охридски“.
Покривите со вегетација на врвот од Халк банка, приватното училиште „Нова“, неколку индивидуални домови на Водно и Спомен-куќата на Тоше Проески во Крушево се дело на фирмата „Зепекомак“.
Проблемот со аерозагадувањето е горчлива тема на Скопје, бидејќи веќе е на листата на најзагадените градови во светот. Можеби ваквите иницијативи сами по себе нема да го решат проблемот, но, сепак, со преземање чекори од граѓаните и од локалните власти може да се потпомогне за намалување на влијанието на штетните честички во воздухот.
Концептот за зелените покриви станува се попопуларен во светот, иако датира уште од поодамна. Нуди топлинска изолација преку целата година, додека во лето температурата на класичните покриви може да достигне и до 65 Целзиусови степени, кај зелените покриви таа е 16-17 степени. Тие овозможуваат и до 20 проценти помала потрошувачка на енергија за греење и ладење на домот под нив, а го продолжуваат векот на траење на покривот, бидејќи го заштитуваат од штетно ултравиолетово зрачење.
Екстензивни и интензивни покриви
Постојат два типа зелени покриви, екстензивни и интензивни.
Екстензивните се со мала и природна вегетација, која бара минимална грижа, просторот за полнење е плиток и се садат треви и растенија, додека интензивните зелени покриви, попознати како зелени градини, бараат поголемо и редовно одржување. Зелениот покрив е систем што е составен од водоотпорна мембрана, коренски бариери, дренажни системи и системи за наводнување. Тие имаат поголема можност за разновидни дизајни, можност за создавање градина во која може да се одгледува овошје, да се произведуваат зеленчук или зрнеста храна. Одгледувањето ваква храна е исплатливо затоа што ги користи локалните ресурси, дождовницата и филтрираната отпадна вода од домаќинствата, соларната енергија и топлината што ја генерира зградата.
ГТЦ во Скопје ќе добие зелен покрив
ГТЦ е симбол на модерно, постземјотресно Скопје.
Со проектот „Зелен покрив на ГТЦ“ финансиран од Град Скопје и имплементиран со поддршка на нашите пријатели од УНДП, постојниот покрив кој сега е речиси неискористен ќе стане атрактивен простор со зелена површина за одмор, рекреација и културно-забавен живот. Освен во урбаниот развој на градот, овој проект ќе придонесе и за намалување на температурата во централното градско подрачје преку намалување на ефектот на урбаните топлински острови, подобрување на квалитетот на воздухот и управувањето со врнежите.
Зазеленувањето на покривот на ГТЦ е дел од проектот со кој Програмата за развој на Обединетите нации (УНДП) ќе го поддржи Градот Скопје во спроведувањето на Стратегијата за климатски промени – Отпорно Скопје.
На зелениот покрив со површина од 1.800 квадратни метри ќе бидат засадени 29 висококвалитетни дрвја и повеќе од 30 други видови садници. Ќе бидат поставени неколку водени зони во форма на фонтани и базени, монтажна бина, партерно шаховско поле, кафе-бар, како и модерна урбана опрема од клупи, корпи за отпадоци и паркинзи за велосипеди. Со зазеленувањето на покривот на ГТЦ, делумно ќе се надомести загубеното зеленило во Малиот ринг коешто до 2017 година претрпе загуби повеќе од 30% од вкупната површина на крошните на дрвјата кои беа засадени во овој дел на градот.
