Додека Русија се бори со ширењето на коронавирусот во земјата, на интернет се појавија видеа на кои може да се види како огромни колони со возила на итна помош се заглавени додека чекаат ред да влезат во болниците.
Руски корисник на Твитер објави видео на кое се гледа огромна колона на возила за итна помош кои што носат пациенти заразени со коронавирусот во клиничкиот центар во Химки во московскиот регион.
Како што соопштија руските власти, метежот настанал поради невообичаено големиот прилив на пациенти заразени со коронавирус, додека епидемијата несопирливо се шири низ земјата и покрај рестриктивните мерки.
Сепак, некои руски медиуми пренесуваат дека метежот настанал поради грешка во логистиката, односно возилата на итна помош не биле пренасочувани откако во клиниката веќе биле исполнети капацитетите.
Русија во текот на вчерашниот ден регистрираше 2,186 новозаразени со што бројката на заразени со коронавирусот во земјата се искачи на над 15 илјади. Досега во Русија како последица на коронавирусот починаа 148 лица. Најголемо жариште во земјата и натму е Москва со над 10 илјади заразени и 72 починати.
