Мутираниот вид на коронавирус кој се шири во Велика Британија е за 56% позаразен од изворниот, предупредуваат на научниците и повикуваат на брзо вакцинирање на населението.
Новиот вид на коронавирус кој се појави на југоистокот на Англија и брзо се шири, ќе го зголеми бројот на хоспитализации и бројот на починати како последица на коронавирус во текот на идната година.
Научниците од Центарот за математички модели на заразни болести во Лондонската школа за хигиена и тропска медицина, анализирајќи ја епидемијата на југоистокот и истокот на Англија, како и во Лондон, заклучиле дека сепак не е јасно дали новата мутација е посмртоносна од претходната.
„Без разлика на тоа, зголемената брзина веројатно ќе доведе до голем пораст на бројот на новозаразени и се проценува дека бројот на хоспитализации и починати идната година ќе порасне во споредба со 2020-та година“, стои во студијата.
Според авторите на студијата, мала е веројатноста дека мерките воведени во Англија во ноември ќе го спречат порастот на бројот на заразени. Тие тврдат дека секое ублажување на мерките веројатно веднаш би резултирало со големо ширење на вирусот.
Објавувајќи ги строгите мерки за време на Божиќните празници, премиерот на Велика Британија, Борис Џонсон порача дека новата мутација на коронавирусот е дури 70% позаразна од изворната верзија на болеста.
Од компанијата „Бајонтек“ која во соработка со „Фајзер“ ја разви првата вакцина против коронавирусот, соопштија дека „многу веројатно е дека вакцината ќе биде делотворна против мутираната верзија откриена во Велика Британија“.
