Согласно податоците од Министерство за здравство, 35 отсто од населението во државата примило две дози вакцина, додека според бројот на аплицирани вакцини, 38 отсто се вакцинирани барем со една доза.
Вакцинацијата против Ковид-19 го намалува ризикот од хоспитализација и смрт за 90 отсто кај лица постари од 50 години и се чини дека е ефикасна против делта сојот на коронавирус, покажуваат резултатите од новата француска студија.
„Тоа значи дека вакцинираните луѓе имаат 9 пати помал ризик од хоспитализација или смрт од Ковид-19 отколку невакцинираните луѓе“, изјавил за АФП епидемиологот Махмуд Зуреик, кој е на чело на научната група Епи-Фар (Epi-Phare).
Ова истражување се однесува на вакцините Фајзер/Бионтек, Модерна и АстраЗенека. Во Македонија се достапни вакцините Фајзер/БиоНТек, која е дозволена и за деца од 12 години и АстраЗенека, која е достапна за лицата над 60 години.
Комитетот за имунизација препорача трета доза „Фајзер“ не само за лица над 60 години и за здравствени работници, туку и за кои било други граѓани доколку се изложени на ризик од Ковид-19, поради тоа што имаат чести контакти на работа или приватно, без оглед на возраста и дали имаат или немаат хронични болести. Податоците од Министерството за здравство покажуваат дека до 9 октомври трета доза примиле 782 граѓани, пренесува „Слободен печат“.
Оваа недела се очекува да започне и тестирање на 8.200 ученици од основните и средните училишта. Тестирањето ќе се одвива по случаен избор од регистарот на Е-дневникот и е во согласност на нивните родители. Скринингот е предвиден да трае 5 дена, а дневно да бидат тестирани по околу 1.600 деца, во самите училишта од мобилни екипи.
Тестирањето во средните и основни училишта, како што појаснуваат надлежните, се одвива со цел да се добијат податоци за евентуална трансмисија на вирусот во училиштата. Во училиштата вакцинирани се околу 75 отсто од наставниците, додека настава на далечина следат околу 2 отсто од учениците, според податоците на Министерството за образование и наука.
