Во третиот натпревар од големото финале, кошаркарите на МЗТ Скопје стигнаа до третиот триумф со 78:67 и со “чисти” 3:0 ја одбранија титулата во домашниот шампионат.
Тимот од Аеродром го освои 11-от пехар во тимската историја. Oд друга страна, тимот од Битола и во третиот обид едно по друго не успева да го симне шампионот од тронот. Импресивно делува податокот дека МЗТ без ниеден пораз во “плејофот” (со 9 победи по ред) успеа да стигне до посакуваната цел.
Капитенот Дамјан Стојановски беше прогласен за најкорисен играч во финалната серија со што петти пат во кариерата дојде до ова ласкаво признание, воедно и рекордно. “Гордоста на штрковите” е многу близу да стане апсолутен рекордер во повеќе параметри доколку се има во предвид дека ова за него е девета освоена титула, со што се израмни со својот постар брат Огнен Стојановски и Марјан Ѓуров.
Договорот на капитенот завршува оваа сезона. Желба на сите кој го сакаат клубот е повторно да го видат во “сино/белиот” дрес. Доколку тоа не се случи за него со сигурност треба да биде резервирано значајно место во управата на клубот каде настапува повеќе од една деценија.
Димитар Младеновски
