Многу познатиот македонски готвач, еден од најдобрите Цветанче Тодоровски, деновиве од Јадранско Море на својот ФБ сподели една многу интересна фотографија која предизвика љубопитност (најмногу кај новинарите).
А, на фотографијата се познати до најпознати. Цветанче се најде во друштвото на мега популарниот пејач Здравко Чолиќ и нашите Аки Рахимовски исто така популарен пејач од групата “Парни ваљак“, како и македонскиот политичар и бизнисмен Љубе Бошковски. Сите на едно место, а местото е Бале, мало туристичко егзотично село на Јадранскиот полустров Истра, каде Љубе со семејството има прекрасна вила “Лав“ во која успешно и пред да стане политичар, направи успех во туризам и угостителство.
–
Македонска (празнична) софра за Здравко Чолиќ, Аки Рахимовски и Љубе Бошковски од кујната на маестро Цветанче Тодоровски
Покрај вкусната храна која е подзасилена и со македонски вина, добриот домаќин Бошковски честитајќи го и Денот на македонската независност (8-ми септември) ги почести своите популарни гости со македонски ајвар, македонско тавче-гравче, македонски зелник, македонски пинџур, македонско селско месо…..Здравко и Аки и јавно беа воодушевени со овие јадења, а тие се производ од готвачката “работилница“ токму од вештите раце на маестро Цветанче кој вели дека е среќен што во Бале се најде во друштвото на легендарните Аки и Здравко и со човекот со големото срце Љубе Бошковски.
-Ми беше чест и задоволство што ги запознав овие прекрасни луѓе, се надевам дека им се допадна јадењето од мојата кујна, нагласува познатиот готвач Тодоровски кој ете, има зошто да биде толку добро расположен.
