Конзумирањето на само 100 грама печурки на ден за само една недела го намалува холестеролот за 12 отсто, покажа научно истражување.
Во исто време, групата испитаници кои во истиот период јаделе околу 60 g путер на ден го зголемила холестеролот за дури 14 проценти. Контролната група која конзумирала иста количина путер во комбинација со 100 гр печурки го намалила холестеролот за четири проценти.
Врз основа на овие резултати е откриено дека печурките се совршен прочистувач на крвта.
Нутриционистите ги нарекуваат „шумско месо“, бидејќи покрај пријатниот вкус и арома, поседуваат исклучителна биолошка вредност. Тие имаат речиси ист квалитет како животинското месо, содржат колку што е 91 проценти од водата и голем број на минерални состојки, особено калиум, а малку помалку калциум, фосфор, железо и магнезиум. Покрај тоа, богати се со растителни влакна, и содржат витамини Б2, Д и Ц.
Сепак, биолошки се посебно вредни поради белковините, а особено поради важните аминокиселини. Интересно е дека свежите печурки поседуваат два отсто белковини, а исушени 22 проценти.
Како природен извор на витамин „Б5“, кој на телото му дава енергија и издржливост, оваа намирница како да е создадена за луѓе кои живеат со забрзано темпо на живот. Исто така, печурките се нискокалорични и со тоа се идеални за оние кои на здрав начин сакаат да загубат некој килограм. Но, како и секоја друга намирница и тие треба правилно да се исчистат и да се приготват за јадење.
● Печурките се природен извор на голема количина на витамини („Б1“, „Б2“, „Ц“ и „Д“) и минерали (калиум, железо, цинк, калциум).
● Преполни се со витамин „B5“ кој на телото му помага да ја апсорбира и максимално да ја искористи енергијата од храната што ја јадеме.
● Имаат многу ниска калорична вредност и содржат малку маснотии, па со самото тоа се извонреден и здрав сојузник при секоја диета.
● Најбогати со протеини се шампињоните и вргањот кои поради тоа се одлична замена за месо.
● Печурките се природен извор на фолна киселина која многу тешко се надополнува по природен пат.
Како се приготвуваат?
● Свежите печурки не смеете да ги миете во вода затоа што тие ја впиваат како сунѓер и на тој начин ги губат нутритивните вредности.
● Набавете посебно сунѓерче или четкичка за чистење на печурките или пак истријте ги убаво со кујнска крпа од погруб материјал се додека не ги отстраните сите траги од земја.
● Не ја фрлајте дршката туку добро исчистете ја и исечете по должина на половина.
● За гулаш и за динстање горниот дел од печурките сечете го на половинки и четвртинки. Така ќе останат сочни и вкусни.
● За омлет, рижото или за сос за тестенини исечете ги на тенки листови за да можат полесно и поубаво да се поврзат со сосот.
● Печурките секогаш пржете ги на добро загреано масло. Најдобро е тоа да се прави на путер или на маслиново масло.
● Ако сакате печурките да се потпечат поубаво, приготвувајте ги во голема тава за да имаат доволно простор.
● Откако ќе ги испржите можете со нив да приготвите што сакате. Додадете им јајце, сланина и зеленчук, збогатете ги со лук и сос од домати или со павлака за готвење и уживајте во вкусниот и здрав оброк.
