Од синоќешните натпревари го издвојуваме дуелот во Канада помеѓу претставниците на централната дивизија, Чикаго Булс и Торонто Репторс. На гостувањето во Онтарио, “биковите” само го потврдија одличниот ритам со кој го започнаа новото првенство.
Демар Дерозан, се врати на местото каде помина девет незаборавни сезони. Својот поранешен клуб го “почести” со 26 поени и 6 асистенции. Одлична игра пружи All-Star бекот, Зек Лавин кој реализира 22 поени а го следеа Никола Вучевич со 17 и Лонзо Бол со 15 поени.
Финишот на натпреварот беше исклучително интересен. По водството на Чикаго од 6 поени на минута до крајот, најпрво Фред Вен Влит положи а потоа дебитантот Скоти Барнс успеа да украде топка и да поентира за само -2. Следуваа слободни фрлања за црногорскиот репрезентативец, Никола Вучевич кој погоди 1 од 2 обиди што отвори шанса за израмнување на резултатот. Ван Влит го имаше последниот обид (за три) кој беше неуспешен за конечен пораз на “рептилите” со конечни 111-108. Иако 6 играчи на Торонто имаа двоцифрен број на поени тоа не резултираше со позитивен резултат.
Новиот триумф на Чикаго значеше и достигнување на ефект од 4 – 0 во победи, што претставува прв пат по шампионската сезона 1996/1997 “булси” да имаат 100% ефект во првите четири натпревари. Токму легендарната ’97 го одбележуваат и најдобриот старт на “бковите” во тимската историја, кога првенството го започнаа со ефект 12 – 0.
NBA FAN
Димитар Младеновски
