Од синоќешната богата NBA програма, го издвојуваме дуелот помеѓу Њу Јорк Никс и Бостон Селтикс. Во меч помеѓу единствените два оригинални NBA тимови, кој годинава слават 75 години од своето постоење, беа потребни две продолженија за да се реши победникот.
По регуларните 48 минути игра, резултатот остана нерешен 116-116. Следуваше првото продолжение во кое двата тима со цврста одбрана не дозволија во последните 2 минути да се постигнат поени на обете страни. Во второто продолжение, водени од своите навивачи, “никси” успејаа да го зададат последниот и конечен удар за вредна победа од конечни 138-134.
Лидер на тимот во преполниот “Медисон сквер гарден” беше Џулиус Рендл со 35 поени, следен од францускиот репрезентативец Еван Фурние кој во своето деби во новиот дрес постигна 32 поени. Ар-Џеј Берет беше стрелец на 19 а Оби Топин на 14 поени. На спротивната страна, личниот рекорд на Џејлен Браун од 46 поени не беа доволни за триумф во “големото јаболко”. Втор стрелец кај “селтикси” беше Џејсон Тејтум со дабл-дабл од 20 поени и 11 скокови, следен од центарот Роберт Вилијамс со 16 поени и 10 скокови.
