Синоќа се судрија првопласираниот тим во Источната конференција и еден од најголемите фаворити во истата. Вашингтон Визардс му гостуваше на Мајами Хит.
“Жешките” беа поддржани од својата тимска легенда. Најдобриот играч во историјата на франшизата, Двеј Вејд, беше во првите редови заедно со сопственикот на клубот, Мики Херисон. На теренот, покажаа игра која беше автентична за времето кога нивни лидер беше популарниот “Флеш”. Мајами настапи без својот перспективен шутер, Тајлер Хироу.
Првото полувреме беше неизвесно. Гостите започнаа силно пред се поради играта на (нивниот лидер) Бредли Бил и крилниот центар, Монтрез Херл. Џими Батлер, го возвраќа ударот. Мајами преку скок шут на All-Star центарот, Бем Адебајо, доаѓа до првото водство во втората четвртина (23-22). Изненадувачки делуваше зрелата игра на младиот бек, Гејб Винсент, кој максимално ја искористи укажаната можност со поени во серија. Атрактивното забивање на 4 минути до крајот на полувремето ја подигна атмосферата во “Американ Ерлајнс” центарот. Адебајо повторно погодува скок шут со кој домаќините одат на одмор со +7 (47-40).
Вториот дел од мечот започна со индивидуален поентерски двобој помеѓу двата најдобри играчи во обете состави. Џими Батлер и Бредли Бил погодуваа еден по друг. Набрзо, на дело беше длабочината на тимот од Флорида. Новодојдените, Пи-Џеј Такер и Кајл Лаури диктираат темпо за високо водство на “жешките” (66-50). Последната четвртина гостите ја започнаа со негатива од 15 поени. Кајл Кузма очајнички пробува да го врати во игра тимот од главниот град. Одговор доаѓа од Гејб Винсент со две тројки по ред. Џими Батлер го задава последниот (решавачки) удар и Мајами повторно се одлепува. На крајот, висока победа за Хит од 112-97.
Џими Батлер беше клучен за успехот со 32 постигнати поени. Бем Адебајо постигна 20 а Гејб Винсент 18 поени. На спротивната страна, Бредли Бил постигна 30 поени а Кајл Кузма 22, недоволно за задржување на лидерската позиција во конференцијата. Со четвртата победа по ред, Мајами Хит, стигна до првото место на табелата на Истокот каде е израмнет со тимот на Бруклин Нетс со идентичен скор 11-5.
NBA FAN
еДимитар Младеновски
