Најдобриот тим во лигата, синоќа гостуваше во Чикаго.
Феникс Санс пристигна во “Јунајтед центар” и го оправдата првото место во лигата. Силниот налет на “биковите” во последната четвртина (во кој постигнаа 41 поен) не беше доволно да се направи пресврт и да се одбрани домашниот терен. Конечни 127-124 за тимот од Аризона.
Девин Букер повторно го покажа својот силен офанзивен арсенал. Постигна 38 поени и беше најдобар стрелец. Генералот Крис Пол подели 11 асистенции а постигна и 19 поени диктирајќи го темпото во текот на целиот меч. Ветеранот Џавејл МекГи за само 22 минути игра постигна 16 поени и беше вистинско освежување од клупата за резеви.
Ѕвездениот бековски тандем на Чикаго, Демар Дерозан и Зек Лавин, заедно постигна вкупно 70 поени кој се покажаа недоволни за победа. Со овој пораз, “биковите” паднаа на третото место на табелата во источната конференција. Феникс Санс се наоѓа на првото место во лигата, со скор 43-10.
NBA FAN
Димитар Младеновски
