Од синоќешните натпревари го издвојуваме натпреварот помеѓу Далас Маверикс и Сакраменто Кингс.
Во дуелот помеѓу третопласираниот и четвртопласираниот тим во Западната конференција, гостите од Тексас испратија силна порака.
“Мавси” од самиот старт на натпреварот играа речиси перфектно во нападот и во првата четвртина постигнаа 45 поени и веќе водеа со 20 поени разлика. Одличното офанзивно издание резултираше со конечна победа од 122:114.
Иако настапија без својот лидер, Лука Дончич, “Маверикс” немаа никаков проблем да го освојат гостинскиот терен на еден од најнезгодните тимови во лигата. Новоангажираниот Кајри Ирвинг беше водечки (втор меч по ред) со “дабл-дабл” учинок сочинет од 25 поени и 10 асистенци. Џош Грин придонесе со 17 а Тим Хардавеј Јуниор постигна 15 поени.
Ако тимот од Тексас победува конкуренти без својот суперстар тоа е повеќе од јасна слика што ќе следува кога (конечно) Дончич и Ирвинг ќе стапнат заедно на теренот.
Далас со третата победа по ред сеуште се наоѓа на четвртата позиција во Западот, со биланс 31-26. И покрај поразот, Сакраменто останува третопласиран тим во конференцијата со скор 31-24.
NBA FAN
Димитар Младеновски
