Овој текст ќе биде најкритички настроен до сега.
Никогаш, (потенцирам никогаш) не сум практикувал да пишувам нешто негативно за професионален спортист. Имајќи во предвид колку жртва, пот, напорна работа и откажувања се потребни за да постигне било каков успех на професионално ниво сум сметал (и сметам) дека единствено што атлетите заслужуваат е почит и поклонување.
Се почесто, слушаме изјави на играчи како не им е важно што ќе каже публиката и дека единствено ги интересира своето мислење. Себичноста и арогантноста достигнува ново ниво. Кулминира од играчи кој (НИКОГАШ) не би биле на тоа место каде што се денес без тие фанови за кој што (по нивни зборови) “не им е гајле”!
Дрејмонд Грин е “првенец” во ова мизерно друштво. Неспорно голем борец кој со напорна работа стана Ол-Стар играч и дефанзивец на годината. Три кратен шампион со Голден Стејт Вориорс, и еклатантен пример како релативно просечен играч во прав колектив (и во право време) може да изгледа како “ѕвезда”.
На сето ова ако се додаде неговиот богат договор не е ни чудо што високото мислење за себе надминува граници и делува илузорно. Грин заработува 25 милиони долари годишно, шокантен податок имајќи во предвид дека во тимот на поранешните шампиони просечно има по 8 поени и 6 скокови сезонава. Кога најдобрите двајца играчи во тимот се отсутни поради повреди (Стеф Кари и Клеј Томсон) токму од Грин се очекуваше да биде лидер на тимот. Неговото однесување ни од далеку не е пример за помладите соиграчи.
Пред некој ден, Грин отворено влезе во конфликт со (NBA легендата) Чарлс Баркли поради критикувањето кое го доби во јавноста. Изјави и дека не може “Сер Чарлс” да се мери со него бидејќи никогаш не освоил NBA титула, заборавајќи на податокот дека лично може само да сонува да го достигне нивото на интензитет и борба кое го поседуваше неговиот постар колега.
Како “капак” на се дојде неговата последна изјава дека воопшто не го интересира што за него мислат навивачите на тимот од Оукленд! На прашањето од новинарите “дали е свесен дека истите тие навивачи” го поддржуваа секојдневно во последните 8 години, неговиот одговор беше дека му е апсолутно сеедно и дека него “си го сакаат неговите роднини и пријатели”!!!
Истиот овој “Деј Деј” заборава дека неговиот идол Бен Волис НИКОГАШ не се обратил негативно кон навивачите во неговата богата NBA кариера, иако (и тоа како) имал причини тоа да го стори. Истиот овој арогантен дечко заборава дека за она што го заработува треба да покаже професионалност, стабилност и респект, како за постарите од него така и за навивачите. Истите тие навивачи кој Грин ги омаловажува се една од главните причини што неговите роднини и пријатели кој му се единствено важни, живеат лусксузен живот со сите подобности.
Во ниту еден случај не сум сакал во негативно светло да опишувам професионален спортист. Секогаш сум коментирал дека секој професионалец е креатор на својот пат, напредок и успех. Но најмалку што Грин може да направи е да покаже минимална (основна) почит за оние кој стоеле крај него во патот кој го поминал пред да стане мулти милионер!
“Money Green” (како што лично сам се нарекува) по којзнае кој пат до сега докажа дека парите се единствено нешто кое го интересира. Ќе си земам за слобода да кажам дека ваков тип на спортисти кој немаат ништо професионално и етички во нив со право се сметани за идиоти.
Дрејмонд Грин е идиот! Од ден на ден се повеќе го потврдува тоа.
NBA FAN
Димитар Младеновски
