Ноќеска официјално беше затворен преодниот рок во NBA. Бевме сведоци на огромен број на размени помеѓу тимовите. Една од најинтересните претставува преминувањето на младиот бек Гери Трент Јуниор од редовите на Портланд во Торонто.
Трент е 22 годишен перспективен млад играч со агресивен стил и неисцрпна желба за борба. Овие карактеристики ги има превземено од својот татко кој имаше 10 годишно NBA искуство. Трент (постариот) беше крилен центар со само 203 цм. но и гранитна мускулеста градба од цели 113 килограми. Никогаш не се откажуваше и се спротивставуваше на далеку повисоките противници, меѓу кој и доминатниот Шекил О’Нил. Настапуваше за Портланд, Торонто, Далас и Минесота а подоцна и во Грција (тимот на Панелиниос) како и во Италија (Лотоматика Рома).
Иако е нецели 10-ина сантиметри понизок од својот родител, Трент (помладиот) презентира жар и борба на секој меч. Гените си го прават своето. Тој ке добие шанса за поголема минутажа при преселбата на тимот од Канада. Сезонава игра исклучително зрела кошарка и постигнува над 15 поени по меч. Но како најинтересен податок е следниот. И таткото и синот професионалната кариера ја започнаа во Портланд. Обајцата во нивната трета сезона беа разменети во Торонто, по одиграни идентични 41 натпревар во тековната сезона. Вистински раритет.
Останува да видиме како ке се одвива кариерата на младиот Трент, а доколку се суди од она што сме имале можност да го видиме, му следува блескава иднина.
NBA FAN
Димитар Младеновски
