Синоќа се одиграа 11 натпревари во NBA, а во центарот на вниманието се најде кошаркарот на Вашингтон, Бредли Бил, кој постигна 60 поени. Неговата маестрална партија не беше доволна за победа на гостинскиот тим. “Волшебниците” беа поразени во тесен и неизвесен меч со краен резултат 141-136.
Бил своето импресивно поентерско издание го подели во двата дела од натпреварот. Првото полувреме го заврши со 32 поени а второто со 28. Тој го надмина својот личен рекорд од 57 постигнати поени, од ланското првенство. Со оваа офанзивна експлозија, “Бред” го изедначи клупскиот рекорд на Гилберт Аренас кој имаше свое шоу во 2006 година, со идентичен поентерски ефект.
На спротивната страна во редовите на Филаделфија, расположени за игра беа Џоел Ембид со 38 поени и Сет Кари со 28 поени. “Сиксерси” дојдоа до седмиот триумф оваа сезона со кој и натаму се на врвот во источната конференција, каде пак Вашингтон е на долниот дел на табелата со скор од 2 победи и 6 порази.
NBA FAN
Димитар Младеновски
