Лос Анџелес Лејкерс се нови NBA шампиони. По пауза од цела деценија се искачија на тронот во најсилната лигата. 
Лејкерси го освоија 17-тиот трофеј во историјата на клубот израмнувајќи се со Бостон Селтикс според бројот на титули. Ја добија финалната серија против Мајами Хит со 4-2 во победи. Четвртиот триумф (со конечен резултат 106-93) го осигураа со моќна и стабилна игра уште во првото полувреме.
Леброн Џејмс, за кого ова е четврти шампионски трофеј (апсолутно заслужено) е избран за MVP на финалето. Со тоа тој се проби на втората позиција на вечната листа според бројот на МВП признанијата. Пред него е Мајкл Џордан со шест.
“Кралот” имаше уште една фантастична партија. Постигна нов трипл-дабл ефект, сочинет од 28 поени, 14 скокови и 10 асистенции во четвртиот триумф на “езерџиите“. Финалната серија ја заврши со импресивен просек од 30 поени, 9 асистенции и 10 скокови по натпревар.
Ентони Дејвис, за кого ова е прв шампински пехар во кариерата средбата ја заврши со 19 поени. Рејжон Рондо кој исто така придонесе со 19 поени во успехот на Лејкерси и воедно запиша историско постигнување. Тој е само вториот играч во историјата на лигата која станал шампион и со Бостон и со Л.А. Лејкерс. Со Бостон тоа му успеа во 2008 година.
Бам Адебајо и покрај повредата, беше одличен кај Мајами со 25 поени. Големиот борец, Џими Батлер немаше сила за оваа средба и заврши само со 12 поени. Со оваа победа Леброн Џејмс изби на првото место на вечната листа на одиграни плејоф натпревари, со вкупно 260.
Тимот од “градот на ангелите” титулата ја посветија на покојниот великан Коби Брајант и неговата керка Џиана кој во хеликоптерска несреќа трагично го загубија животот во Февруари годинава.
Ветувањето на Леброн кон навивачите на “пурпурно / златните” е исполнето. Сведоци сме на еден од најголемите на сите времиња!
NBA FAN
Димитар Младеновски
